Toshkentda “AKFA Medline Social” loyihasi taqdim etildi.

Toshkentda AKFA Medline Social loyihasining rasmiy taqdimoti bo‘lib o‘tdi — bu xususiy tibbiy startap, aholiga birlamchi tibbiy yordamning barcha xizmatlarini mutlaqo bepul taqdim etadi: shifokor maslahatidan laboratoriya va rentgen diagnostikasigacha, navbatlarsiz va zamonaviy raqamli texnologiyalar yordamida.

Loyiha AKFA Group tomonidan Central Asian University va AKFA Medline University Hospital hamkorligida Alfraganus turar-joy majmuasida amalga oshirilmoqda va yangi turdagi diagnostika markazini namoyon etadi — to‘lovlarsiz, navbatlarsiz va to‘liq onlayn-servislar to‘plami bilan. Barcha tibbiy xizmatlar mutlaqo bepul ko‘rsatiladi.

"Biz qadriyatlarga asoslangan tizim yaratmoqdamiz: intizom, yetakchilik, hurmat va jamiyat oldida mas’uliyat. Bularning barchasini xuddi o‘zimiz va yaqinlarimizga yordam berayotgandek amalga oshiramiz", — deya ta’kidladi AKFA Group asoschisi Jahongir Artixo‘jayev.

Tashabbus AKFA Group tomonidan ilgari surilgan va davlat sog‘liqni saqlash siyosati asosida amalga oshirilmoqda, hamda aholi uchun mavjud tibbiy xizmatlar tizimiga muhim qo‘shimcha bo‘ladi.

35 300 m² maydonga ega markaz kuniga 3 000 nafar bemorni va yiliga 500 000 nafargacha aholini qabul qila oladi, 36 dan ortiq yo‘nalishda birlamchi tibbiy yordam ko‘rsatadi. Jamoada O‘zbekiston va xorijda malaka oshirgan 300 dan ortiq malakali mutaxassislar ishlaydi. Muassasa Siemens va Roche kabi yetakchi ishlab chiqaruvchilarning zamonaviy uskunalari bilan jihozlanadi.

Central Asian University rektori Kamron G‘ulomovning aytishicha, AKFA Medline Social loyihasi zamonaviy sog‘liqni saqlash yondashuvlarini aks ettiradi:

“Jahon sog‘liqni saqlash tashkiloti hisob-kitoblariga ko‘ra, barcha tibbiy holatlarning 75% gacha bo‘lgan qismini birlamchi tibbiy yordam bosqichida, shifoxonaga yotqizish va murakkab aralashuvlarsiz hal qilish mumkin. Bizning maqsadimiz — bunday xizmatlarni har bir fuqaro uchun ochiq va qulay qilish, erta tashxis va kasalliklarning oldini olishga e’tibor qaratish.”

Markazning makoni bemorlar uchun maksimal qulaylik yaratadigan tarzda loyihalashtirilgan — zamonaviy mehmonxona lobbisini eslatadi: aniq navigatsiya, raqamli terminallar, osoyishta muhit va har bir insonga hurmatli munosabat. Barcha jarayonlar to‘liq avtomatlashtirilgan, xizmatlar esa oddiy, tez va hamma uchun ochiq.

Markazning rasmiy taqdimotida jurnalistlar, biznes va tibbiyot sohasi vakillari ishtirok etdi. Mehmonlarga markaz qanday ko‘rinishda bo‘lishi, uning rejasi va arxitekturasi taqdim etildi, savol-javoblar o‘tkazildi va qurilish rasman boshlab berildi.

AKFA Medline University Hospital direktori Azimjon Tursunkulov asosiy e’tibor sifatli tibbiy xizmatlarni ta’minlashga qaratilishini ta’kidladi:

“Sifat nazorati xalqaro standartlarga va Sog‘liqni saqlash vazirligining talablariga to‘liq rioya qilgan holda olib boriladi. Biz shunday tizim yaratmoqdamizki, unda bemorlar o‘z vaqtida, xavfsiz va professional yordamni qulay raqamli muhitda olishlari mumkin bo‘ladi.”

Markaz qurilishi 2026 yil yozida yakunlanadi va undan so‘ng AKFA Medline Social bemorlarni qabul qilishni boshlaydi. Loyiha to‘liq AKFA Group mablag‘lari hisobidan moliyalashtiriladi.

AKFA Medline Social’ga xodimlarni tanlash jarayoni allaqachon boshlangan va kutish ro‘yxati (Waiting list) asosida olib borilmoqda. Jamoaga qo‘shilishni istagan mutaxassislar loyihaning rasmiy saytida ariza topshirishlari mumkin.