Central Asian University va Cleveland Clinic

Hamkorlik O‘zbekistonda universitet klinikasini barpo etish bo‘yicha uzoq muddatli strategik kelishuv doirasida Cleveland Clinic Connected dasturi asosida amalga oshirilmoqda.

Cleveland Clinic va Central Asian University (CAU) Toshkent shahrida universitetning kengaytirilgan tibbiy kampusida joylashadigan Central Asian University Hospitalni rivojlantirish bo‘yicha hamkorlik shartnomasini imzoladi. Qurilish ishlari shu yilning o‘zida boshlanishi rejalashtirilgan.

Ushbu hamkorlik doirasida Central Asian University Hospital Cleveland Clinic Connected dasturining vaqtinchalik ishtirokchisi maqomini oldi. Klinikaga to‘liq a’zolikni olish uchun rahbariyat sifat standartlari va talablarni bajarish bo‘yicha barcha bosqichlarni amalga oshiradi.

Cleveland Clinic ko‘magidagi yo‘nalishlar

Cleveland Clinic — AQSh va dunyodagi eng nufuzli tibbiyot markazlaridan biri bo‘lib, uzoq muddatli strategik hamkorlik doirasida CAUga quyidagi yo‘nalishlarda yordam ko‘rsatadi:

• tibbiy muassasani loyihalash va boshqarish;
• ta’lim dasturlari va rezidenturalarni rivojlantirish hamda tasdiqlash;
• hamshiralik maktabi va simulyatsion markaz yaratish;
• klinik stajirovkalar, ma’ruzalar va ilmiy tajriba almashuvlarini tashkil etish;
• shifokorlarni tanlash, yetkazib berish zanjirini boshqarish va raqamli transformatsiya;
• Central Asian University Hospital shifokorlari murakkab klinik holatlar bo‘yicha Cleveland Clinic mutaxassislari bilan maslahatlashish imkoniyatiga ega bo‘ladi;
• klinika mutaxassislarining samarali faoliyatini ta’minlash hamda barqaror professional jamoa shakllantirish.

Rasmiy izohlar

“Biz CAU bilan hamkorlikni boshlashdan mamnunmiz. Ushbu loyiha orqali O‘zbekistonda tibbiy yordam sifatini oshirishga hissa qo‘shamiz. Bizning missiyamiz — Cleveland Clinic standartlarini butun dunyo bo‘ylab bemorlarga yetkazishdir. Ushbu hamkorlik yuqori sifatli sog‘liqni saqlash xizmatlariga kirishni yaxshilash imkonini beradi”,
— dedi Tommazo Falkone, Cleveland Clinic’ning xalqaro va rivojlanayotgan bozorlardagi ijrochi vitse-prezidenti.

Central Asian University Hospital loyihasi

Hamkorlikning dastlabki bosqichida Central Asian University Hospital butunlay Cleveland Clinic modeli asosida loyihalashtiriladi. Unda multidisiplinar yo‘nalishlar, klinika markazlari va zamonaviy tibbiy uskunalar integratsiyasi amalga oshiriladi.

Yangi klinika 120 o‘rinli bo‘lib, yiliga 269 000 nafargacha bemorga xizmat ko‘rsatish imkoniyatiga ega bo‘ladi va O‘zbekistondagi eng zamonaviy hamda samarali tibbiy markazlardan biriga aylanishi kutilmoqda.

“Cleveland Clinic bilan hamkorlik — O‘zbekistonda tibbiyot va tibbiy ta’limning kelajak modelini shakllantirishdagi muhim qadamlardan biridir. Biz dunyodagi eng yaxshi tajribalar va innovatsion yondashuvlardan foydalanish imkoniyatiga ega bo‘lamiz, bu esa kelajakdagi shifokorlar hamda bemorlar uchun katta foyda keltiradi”,
— dedi Kamran Gulamov, CAU rektori.

Hamkorlikning asosiy afzalliklari

• Cleveland Clinic metodikasi, protokollari va ilg‘or amaliyotlarining transferi;
• klinik va ma’muriy xodimlarni sifatli tayyorlash dasturlari;
• Cleveland Clinic’ning keng qamrovli ta’lim va amaliyot dasturlariga to‘liq kirish;
• CAU shifokorlari va rahbariyati uchun stajirovka, master-klass va tajriba almashish imkoniyatlari;
• CAU bemorlari Cleveland Clinic’ning eng yaxshi amaliyotlari asosida xizmat olishadi;
• murakkab holatlarda bemorlarni xalqaro Cleveland Clinic klinikalariga yo‘naltirish imkoniyati.

Cleveland Clinic Connected dasturi haqida

Cleveland Clinic Connected — bu global tibbiyot hamjamiyatini shakllantirishga qaratilgan xalqaro dastur bo‘lib, dunyo bo‘ylab sifatga yo‘naltirilgan, mustaqil va innovatsion tibbiyot muassasalarini birlashtiradi.

Ushbu dastur klinikalarga Cleveland Clinicning ilg‘or tajribasi, klinik ekspertizasi va boshqaruv yondashuvlarini joriy etishga yordam beradi, natijada bemorlarga yuqori sifatli tibbiy xizmat ko‘rsatish imkoniyatlari kengayadi.